محدش يقدر ينكر ان  الكورسات الأون لاين سهلت علينا تعلم حاجات كتير رغم تخوفنا منها في البداية  و عدم تقبلنا لفكرة ان في حد من مكان تاني هيشرحلي حاجة والمفروض افهمها. وقعدنا فترة كبيرة جدا نقارن مابينها وبين الكورسات الأوف لاين ونقول أيه الأحسن,,لحد مالمقارنة دي اختفت لان الاون لاين  قدر يثبت نفسه مع الوقت ويطور في تلببة احتياجات المستخدمين. والناس ابتدت تاخده على محمل الجد عكس ما كانت بتعمل قبل كدة.

 

لكن في مشكلة:

في ناس كتيرة بتتفرج على كورسات اون لاين ومبتكملهاش او مبتستفدش منها استفادة حقيقة, وعادة هيشوفوا ان الاون لاين مش مفيد ليهم وان لازم يدوروا على بدايل.

طيب قبل مانقرر الأون لاين مفيد ولا لأ هل لما كنا بنتفاعل معااه بشكل صحيح عشان يجيب معانا نتيجة مؤثرة ؟!!

 

لو انت واحد من الناس اللي لسة عندها مشكلة مع الأستفادة بالكورسات الاون لاين ونفسها توصل لنتيجة مؤثرة اثناء وبعد الكورس فالمقال  ده ليك.

ولو انت معندكش مشكلة في الكورسات الاون لاين وشايف انك بتعرف تستفاد منها الأستفادة الكاملة. فممكن تقرا المقال وتقولنا انت بتعمل الخطوات دي ولا في طريقة تانية بتتناسب معاك اكتر تشاركنا بيها.

ملحوظة : الخطوات اللي هنقولها في المقال ممكن تستفاد بيها بأي كورس اون لاين مش وسيلة بس.

 

حدد وقت للكورس

زي ماكنت هتاخد كورس أوف لاين ,, هيبقى ليه مواعيد ثابتة وانت مرتبط بيها وهتظبط يومك على اساسها نفس الكلام في الكورسات الأون لاين. يبقى ليه مواعيد ثابتة الفرق الوحيد ان انت ممكن تذاكر في اوقات عمرك ماكنت هتحددها لو كنت بتاخد كورس في مركز, زي انك تذاكر  الساعة 5 الصبح لو أنت بتصحى بدري ولو كنت من الشخصيات اللي بتحب تسهر فانسب وقت هو الساعة 3 قبل الفجر.

 

الفكرة انك تشوف اكتر وقت في يومك مخك بيكون نشط فيه ومستعد يستقبل معلومات وتخصصه للكورس اللي بتاخده.

 

بالجلسة مش بالتاسك

لو عايز تنجز فعلا في اي كورس وتفهمه وتركز فيه وتحس انك فعلا مستفيد. هو انك تقسّمه والتقسيمة مش هيكون عن طريق ان انا كل يوم هخلص فيديو فيه لا ,التقسيمة هنا خليها  بالوقت قول انا كل يوم او الأيام المتاح انك تذاكر فيها هذاكر ساعتين او ساعة على حسب وقتك  والوقت ده  يتقسموا 25 دقيقة مذاكرة وتركيز , وبريك 5 دقايق وبعدها 25 دقيقة وبريك 5 دقايق وهكذا.

واثناء الكورس تبعد  عن اي مشتتات انت والكورس والستوب واتش وبس.لو الستوب واتش على الموبايل يبقى خلي موبايلك على الـFlight mode ;)

 

اهم حاجة في الخطوة دي هي الاستمرارية والألتزام ومتقفش على نفسك في يومين عشان تخلص الكورس, هتخلصه ومش هتستفاد منه حاجة لكن لو اديته كل يوم ساعتين ممكن تخلصه على 10 ايام بس هتكون متمكن منه.

العلم مش في الراس ولا في الكراس.

سمعت عن ظاهرة اسمها "Illusion of competence" ودي ظاهرة توهم التعلم,, اللي هو انت بتقرا مقال على النت او بتسمع فيديو تعليمي وتقول لنفسك لا اسجل ايه ده انا مركز جدا انا حفظته خلاص تيجي تحكي لاصحابك عليه عشان يستفادوا بالمعلومات اللي اخدتها تلاقي نص المصطلحات واقعة منك والفكرة مش كاملة ده بقى االظاهرة.

ايه الحل اني اتخلص من الظاهرة دي؟

ايا كان اللي بتذكره بتسمع شرح بسيط وتلخص اللي فهمته وتدرب عليه وتشوف بتعرف تنفذه بشكل عملي ولا لأ. اغلب الكورسات اللي موجودة على النت ومن ضمنهم وسيلة ممكن يكون الكورس من 1-4 ساعات الكورس كامل لانه هو بيعتمد على انه يديلك المعلومة في كبسولة او مضغوطة وانت المفروض تفكها ,, هتفكها ازاي بالتدريب بالممارسة متعدييش خطوة الا لما تكون اتدربت عليها وفهمت كل جوانبها. حتى لو كان الموضوع نظري متعديش اي معلومة غير لما تكون فهمت الفكرة والسياق بتاعها.

  

المناقشة والمشاركة وطرح الأسئلة.

من اهم الحاجات اللي المفروض تستفاد منها في الكورسات الاون لاين هي المناقشات اللي بتكون موجودة في الكورس ممكن تلاقيها في الكومنتات وممكن تلاقيها على جروب او المواقع الكبيرة عادة بتكون عاملة مجتمعات للمجالات اللي بتدرسها.

المناقشة هتفيدك في انك توصل لوجهات نظر مختلفة ومعلومات اكثر عمقا من اللي معاك, وكمان مشاركتك للناس بالمعلومات اللي عندك هتضيف ليهم زي مااضافوا ليك.

وطرح الأسئلة وقرئتك للأسئلة التانية هيزود فهمك للموضوع اللي بتاخد فيه الكورس.

 

متكتفيش بالكورس وبس المناقشة والاسئلة مفيدين جدا وهيفرقوا معاك جامد.

كمل للأخر

 

طبيعتنا كبشر بنزهق ونمل بسرعة. ولما بنقرب نخلص الحاجة اللي في ايدينا بيجيلنا احساس اننا خلصناها فعلا والحقيقة انها مخلصتش لسة ليها باقي عشان كدة متستلمش لحكاية انا خلصت اغلب الكورس والجزء اللي باقي منه ده سهل هذاكروا بعدين او مش هذاكروا اصلا.

او انا اخدت اللي انا عايزة من الكورس. اعتقد لو كنت تعرف انت عايز ايه مكنتش اخدت فيه كورس ;)

 

الخلاصة: 

كل حاجة ليها ميزة وعيب اهم حاجة اننا نستفاد بميزاتها ونعالج عيوبها او عيوبنا :D

اهم حاجة في علم هو الالتزام بيه وتطبيقه كما يجب وده الفيصل اللي بينك وبين غيرك  سواء على المدى القريب او البعيد هيأثر عليك بشكل أو بأخر.

 

قلنا بقى بتذاكر كورسات الأون لاين ازاي؟ وبتنفع معاك ولا لأ؟